ӘКІМНІҢ ҚҰТТЫҚТАУЛАРЫ


Қадірменді ауылшаруашылық еңбеккерлері!

Құрметті қала тұрғындары және қонақтар!

Сіздерді «Алтын күз» мерекесімен қала әкімдігі және өз атымнан шын жүректен құттықтаймын!

Сіздермен жадыраған жаз айына бергісіз жарасымдық пен қуанышқа толы қараша айының қарапайым халыққа қарасқан шуақты күні жүздесіп отырмыз.

Елбасымыз Нұрсұлтан Әбішұлы Назарбаевтың «Мерекелі күндерге жеткізген берекелі тірлігіміз баянды болсын» - деп барша елімізді ынтымаққа шақырғанындай біздің күшіміз бен сеніміміз халықтың бірлігі мен жарасымды жарастығында.     

Елдің де жердің де атақ абыройын еңбек адамдары шығаратындығы белгілі.

 Нағыз еңбек адамы елдің баянды бағы.

Арыс қаласының еңбек озаттары да Елбасының тапсырмалары мен мемлекеттік бағдарламаларды іске асыру мақсатында тынымсыз және тыңғылықты жұмыстар жүргізіп, бұл мерекені өзіндік жақсы көрсеткіштермен қарсы алып отыр.

Экономикаға серпін беретін жобалардың арқасында ауылшаруашылық құрылымдары ағымдағы жылы 10 миллиард 226 миллион 500 мың теңгенің өнімдерін өндірді.

Биыл 27 мың 899 гектар жерге ауыл шаруашылығы дақылдары егілді.

  905 гектар жер  тамшылатып суғару әдісімен игерілді. 6 гектар жылыжайдан өнім алынуда.  

Ауылшаруашылығына қажетті 46 дана жаңа техника алынды.    

Жылдың қорытындысы бойынша 14 мың 328 гектардан 8649 тонна арпа-бидай, 215 мың тонна мал азығы, 940  гектардан 6 мың 110 тонна жүгері дәні, 964 гектардан 2321 тонна мақта, 1766 гектардан 566 тонна мақсары, 78 гектардан 1615 тонна картоп, 3487 гектардан 72 мың 160 тонна бақша дақылдары және 542 гектардан 33 мың тонна көкөніс өнімдері жиналды.

Алдағы 2019 жылдың есебіне 8200 гектар жер айдалып, оның 4000 гектарына күздік егіс егіліп, егу жұмыстары жалғасуда.

Мал шаруашылығы бойынша алынған өнімдерге тоқталар болсақ;

Қаламызда 34 мың 500 ірі қара, 2000 түйе, 13 мың жылқы, 408 мың  қой, 13 мың 600 ешкі, 70 мың құстан 5410 тонна ет, 15 мың 300 тонна сүт, 6 миллион дана жұмыртқа алып, қала мен ауыл тұрғындары сапалы азық түлікпен қамтамасыз етуде.

Биылғы жылы «Сыбаға», «Алтын асық», «Құлан»  бағдарламалары бойынша берілген тапсырмалар артығымен орындалды.

ІҚМ бордақылау, Шағын жанұялық сүт фермасын құру, Құс фермасын құру тапсырмалары бойынша межеленген жоспарлар асыра орындалды.  

Халқымызда «Еңбек етпесең елге өкпелеме, егін екпесең жерге өкпелеме» деген нақыл сөз бар.

Күз дегеніміз – байлық, молшылық, жазира даланың дархан дастарханы екені белгілі.

Бүгінгі «Алтын күз» мерекесіне әнші сазгерлеріміз өздерінің өнерін әкелсе, агроқұрылымдарымыз өздері өндірген ауылшаруашылық өнімдерін қала жұртшылығына ұсынып отыр.                      

Сондықтан ауыл шаруашылығын дамыту мақсатындағы үкіметтің қабылдаған бағдарламаларын жүзеге асыру аясында алдағы уақытта барлығыңызды әсіресе жастарды еңбектенуге шақырамын.

Құрметті ауылшаруашылық еңбеккерлері мен қала тұрғындары!

 «Бәсекеге қабілетті, дені сау ұлт» болу үшін тәрбие мен білімді және ұлт денсаулығын айтпау мүмкін емес.

Ас адамның арқауы дегендей осы тұрғыда Сіздердің ұлттық кәсібімізді ұлықтап, табиғи таза ауылшаруашылығы өнімдерімен қамтамасыз етудегі еңбектеріңізге зор алғыс айта отырып, Сіздерге зор денсаулық, қажымас қайрат, күш қуат, молшылық тілеймін.  

Шаңырақтарыңыз шаттыққа, ізгілікті істеріңіз береке мен ырысқа толсын.

Мереке құтты болсын!


Қала әкімі М.Б.Қадырбектің байланыс және ақпарат қызметкерлері күні мерекесінде сөйлейтін сөзі

 

Қала әкімдігінің
үлкен мәжіліс залы
28.06.2018 жыл, сағат 10-00

Құрметті байланыс және ақпарат саласының қызметкерлері!

Сіздерді кәсіби мерекелеріңіз – Байланыс және ақпарат қызметкерлері күнімен Арыс қаласы әкімдігі және өз атымнан шын жүректен құттықтаймын.

Биылғы жылы бұл мереке айрықша маңызға ие болып отыр. Бүгінде барша қазақстандықтармен бірге Арыс қаласының тұрғындары да аса зор саяси және қоғамдық маңызы бар айтулы оқиға – Елордамыз Астананың 20-жылдығын атап өтуге қызу дайындық үстінде.

Бұқаралық ақпарат құралдарының Қазақстанның тәуелсіз мемлекет ретінде қалыптасу жылдарындағы әлеуметтік-экономикалық салалардағы өркенді өзгерістердегі алатын орны мен атқарған қызметі айрықша.

Сіздер Ұлт көшбасшысы Нұрсұлтан Әбішұлы Назарбаевтың жасампаз идеяларының төңірегіне қоғамды топтастыру, ұлтты ұйыстыруға зор үлес қосып келесіздер.

Сондықтан сіздерді Байланыс және ақпарат қызметкерлері күнімен құттықтай отырып, біздің ортақ мерекеміз Астананың мерейтойымен де құттықтағым келеді.

Біздің елімізде бұқаралық ақпарат құралдарына деген қарым-қатынас ерекше. Халық сіздерге сенеді, сіздерге құлақ асады, көп жағдайда қоғамдық көңіл-күйде ақпарат құралдарына байланысты болып жатады.     Сонымен қатар сіздер билік пен бұқараның арасындағы алтын көпір, дәйекті дәнекерсіздер. Жұртшылық мерзімді басылым, теледидар, радио, Интернет арқылы өмірде болып жатқан алуан түрлі оқиғалардан хабардар болып, мемлекеттік органдардың қызметі туралы біліп отырады.

Арыс қаласының бұқаралық ақпарат құралдары қашанда шынайы ақпараттың қайнар көзі болып келеді. Мемлекет мүддесі, ұлт мұраты мен ұрпақ болашағына бағытталған мақалалар деңгейі артып, көкжиегі кеңейіп келеді.

Байланыс және ақпарат қызметкерлері күні - газет пен журнал, телевизия мен радио, полиграфиялық сала қызметкерлеріне ортақ мереке.  Бұл - тек журналистер үшін ғана емес, сонымен бірге кадр сыртындағы жандар мен газет-журнал беттерін қалыптайтын, хабарды эфирге дайындайтын мамандар үшін де маңызы зор күн.

         Қымбатты достар!

Сіздерге еселі еңбектеріңіз үшін үлкен алғысымды білдіре отырып, алдағы уақытта да қоғамымызды нығайтып, қаламыздың өсіп-өркендеуіне сүбелі үлес қоса береді деген сенімдемін.    Баршаңызға мықты денсаулық пен баянды бақыт, шығармашылық табыс пен шалқар шабыт тілеймін.


 
Арыс қаласының әкімі М.Қадырбектің Қазақстан Республикасының мемлекеттік
рәміздері күніне орай өтетін салтанатты жиында сөйлейтін сөзі.

                 

Өтетін орны:Қала әкімдігінің
үлкен мәжіліс залы
Мерзімі:04.06.2018 жыл
Сағат: 11-00

 

Құрметті қазақстандықтар!

Қадірменді жерлестер!

Сіздерді Арыс қаласы әкімдігі және өз атымнан Қазақстан Республикасының Мемлекеттік рәміздеріне 26 жыл толуына орай  4 маусым - Қазақстан Республикасының рәміздері күнімен шын жүректен құттықтаймын!

Ұлттық патриотизм, Отанға деген сүйіспеншілік, туған жерге деген ыстық ықылас – адамның рухани болмысын айқындайтын асыл ұғым. Ал, Отанға деген сүйіспеншілікті әрбір жүрекке ұялататын Елдің нышандары екені сөзсіз.

Президентіміз Нұрсұлтан Әбішұлы Назарбаев: «Біз Тәуелсіздікке аңсап, зарығып жеттік. Енді Тәуелсіздіктің қасиетті белгілерін де ерекше қадірлеуіміз, қастерлеуіміз қажет. Әрбір азамат Қазақстанның Туын, Елтаңбасын, Әнұранын тұмардай қасиет тұтуы қажет. Елдігіміздің сыналар тұсы да осы» деп ерекше атап көрсетті.  

Отан мен мемлекет ортақ. Қай уақытта болса да, әлемнің әр түкпіріндегі елдер үшін де Тәуелсіздік пен мемлекеттіліктің кең көрінісі мемлекеттік рәміздер болып табылады. Ел Тәуелсіздігін мемлекеттік рәміздерден бөліп алып қарай алмаймыз.

Мемлекеттік рәміздер өзінің болмысымен, мазмұнымен әрбір азаматтың туған еліне деген отаншылдық, патриоттық рухын асқақтатады.

Барлық уақытта мемлекеттік рәміздер ерекше ұлттық мақтаныш нышаны болған, сондықтан оларға құрметпен қарау әр қазақстандықтың азаматтық борышы және мемлекеттік ішкі саясаттың басты бағыты.

Тарих беттерінде Мемлекеттік рәміздер басты құндылық болып, халықтарды жігерлендіріп, қаншама ұлы ерліктер жасалған, өмірлерін пида еткен.

Бүгінде Тәуелсіз мемлекетіміздің  Мемлекеттік Туы Біріккен Ұлттар Ұйымының  штаб-пәтерінде, Венадағы Еуропадағы қауіпсіздік және ынтымақтастық жөніндегі ұйымының  штаб-пәтерінің алдындағы әлемнің дамыған  56 мемлекеттің тулары  қатарында, Отанымыздың  шетелдердегі Елшіліктерінде  желбіреуде. 

Дәлірек айтсақ, Отан мен мемлекеттік рәміздер егіз ұғым. Осы егіз ұғымды жадымызда мықтап ұстап, көздің қарашығындай сақтай білсек және қорғай білсек – рухымыз асқақ болады.

Қала әкімдігі Тәуелсіздігіміздің ажырамас бөлігі – мемлекеттік рәміздерді құрметтеу, осы арқылы тұрғындар, әсіресе жастар арасында отансүйгіштік сезімді қалыптастыру бағытындағы жұмыстарды үнемі басты назарда ұстап келеді.

Бұл орайда қаламыздың кіре берісіне орнатылған биіктігі 30 метр «Тәуелсіздік» стелласының орны бөлек.

         Қаламызда жиі өткізілетін ірі мәдени және спорттық іс-шараларда Әнұранымыз асқақтап, жаңа жеңістер мен жетістіктерге жетелейді.

Ардақты арыстықтар!

Сіздерді,  сіздер арқылы қаламыздың барлық тұрғындарын 4-маусым Қазақстан Республикасының рәміздері күні  мерекесімен  шын жүректен құттықтаймын! 

Әрбір шаңыраққа сарқылмас шаттық, таусылмас несібе, бақыт пен береке тілеймін!

 
Көк Туымыз тұғырлы,
Тәуелсіз еліміз ғұмырлы болсын!
 
Ізгі ниетпен, Арыс қаласының әкімі М.Қадырбек.

Арыс қаласы әкімі М.Қадырбектің 1 маусым – Балаларды қорғау күні  мерекесiнде сөйлейтін сөзі

01.06.2018 жыл.

Құрметті балалар!
Қадiрмендi ата-аналар!

 

Сіздер кеше ғана оқу жылын сәтті аяқтап, жазғы демалыстың алғашқы күнін қарсы алып отырсыздар.
Бүгін - Халықаралық балаларды қорғау күні.
Бүгінгі күн — ерекше, мағынасы зор күн, бүлдіршіндер үшін ең жақсы және қуанышты мереке болып табылады. Сіздерді, қымбатты балалар, осы мерекемен шын жүректен құттықтаймын! 
Балаларды қорғау күні жаздың басталғанын – балалардың демалысы үшін тамаша уақытты көрсетеді.
«Жаздың бірінші күніне дәл келетін, балаларды қорғау күні - ең ескі халықаралық мерекелердің бірі, оны бүкіл әлемде 1950 жылдан бастап аталып өтуде.
Біздер үшін басты байлық – Сіздердің күміс күлкілеріңіз бен шат-шадыман көңіл-күйлеріңіз.
Қазақстанның мемлекеттік саясаты балалардың дамуына, олардың дүниеге көзқарасын қалыптастыруға, дұрыс және шығармашылықта ойлап дамуына барынша жағдай жасауға бағытталып отыр.
Еліміздің әлеуметтік саясат саласында отбасылардың өмір сүру деңгейін жақсарту үшін барлық шаралар жүзеге асырылуда.
    Қазақстанның болашағы — бұл біздің балаларымыз.
Сондықтан өркениетті және гүлденген қоғамды құруға атсалысатын Тәуелсіз Қазақстанның лайықты азаматтарын тәрбиелеуге тиіспіз.
      Балаларды тәрбиелей отырып, бүгінгі күні ата-ана еліміздің болашақ тарихын тәрбиелейді, яғни әлемнің тарихын да тәрбиелеп жатыр деген сөз.
      Отанымыздың өсіп-өркендеуі сендердің қалай білім алып, елдеріңді қаншалықты сүйетіндеріңе байланысты.
Бүгін және әрқашан жүректерің бақыт пен мейірімділікке, таза ниетке толы болсын, жүздеріңнен күлкі кетпесін.
Өйткені дүниеде баланың күлкісіне тең келер ештеңе жоқ.
Мерекелерің құтты болсын!.
Жақсы демалып, бақытты болуларыңызға шын жүректен тілектеспін!

Арыс қаласының әкімі М.Қадырбектің Наурыз мерекесінде сөйлейтін сөзі.

Өтетін орны:       Әл-Фараби алаңы
Өтетін күні:            22.03.2018 жыл
сағат 11-00

 

Құрметті Арыстықтар! 
Ардақты ағайын!
 

Халқымыз Ұлы күнге балаған, жыл басы санаған жасампаз Наурыз – бірлік пен береке мерекесі.

Баршаңызды осы ұлағатты мерекемен Арыс қаласы әкімдігі және өз атымнан шын жүректен құттықтаймын!

Дастарханға ақ толатын, елімізге бақ қонатын бүгінгі арайлы шақты халқымыз Ұлыстың ұлы күні деп ұлықтаған.

Күн мен түнді теңеген, іргемізді ізгілікке бөлеген Әз-Наурыз бүкіл адамзатқа шаттық сыйлайды.

         Жыл басы Наурызбен бірге ызғарлы қыстың орнын шуақты көктем басып, тіршілік қайта түлейді.

         Бұл күні адамдар бұлақ көзін ашып, ағаш еккен, жоқ-жітікке жәрдемдескен.

         Алыс кеткен ағайын қауышқан, араз жандар татуласып, қайта табысқан.

         Сондықтан түсінікті ту етіп, елді бірлік пен ынтымаққа, адамгершілік пен имандылыққа үндейтін Наурыз мерекесінің татулығы жарасқан еліміз үшін маңызы ерекше.

         Қадірлі қауым!

Дін мен тілге бөлмейтін Наурыз мейрамы Тәуелсіздік жылдары ұлысымызды ұйыстыра түсті.

Бүгінде ол үш күн бойы тойланатын еліміздегі ең үлкен мереке.

Ұлы өркениетіміздентамыр тартқан Ұлыстың ұлы күні ай мен күндей, әлемге бірдей адамзаттың ортақ қазынасына айналды.

Біріккен ұлттар ұйымының Наурызды халықаралық мереке ретінде қабылдауы да сондықтан.

Әз-Наурыз Отанға деген шынайы сүйіспеншілікті – мемлекеттік сананы орнықтырды.

Сондықтан біз басты байлығымыз – берекелі бірлігімізді көздің қарашығындай сақтауымыз керек.

Елдік рухы мықты халықтың бақыты қашанда баянды болады. Сондықтан осындай игі дәстүрді ұрпақ бойына молынан сіңіруге тиіспіз.

Қабырғалы қалпын, салиқалы салтын сақтаған еліміз Тәуелсіздіктің алғашқы 27 жылын толайым табыспен аяқтады.

Тарих үшін қысқа мерзімде Тұңғыш Президентіміз Нұрсұлтан Әбішұлы Назарбаевтың сарабдал саясатының нәтижесінде елімізде ұланғайыр істер атқарылуда.

Осы жылдар ішінде ел экономикасы еселеніп өсіп, іргелі ел, жоралы жұрт қатарына қосылдық.

Мәдени мұрамызды түгендеп, ұлттық сананы нығайттық.

Қандастарымызды атамекенге жинадық.

Бақ құсы ынтымақты елге қонады, бейбіт елде ғана береке болады.

Біз Қазақстан халқының ынтымағын сақтап, айнымас ауыз бірлігімізді бекемдей түстік.

Ағымдағы жылы бас қаламыз - Астана қаласының 20 жылдығын, 5 қараша – Қазақстан Республикасы Президентінің «Болашақ» халықаралық стипендияларын белгілеу туралы қаулысына 25 жыл және 15 қараша – Қазақстан Республикасының ұлттық валютасы Теңгенің айналымға енгеніне 25 жыл толғанын атап өтеміз.

Осының бәрі Тәуелсіздіктің арқасында жүзеге асуда. Алдымызда ұлан асулар, биік белестер тұр.

Мақсатымыз – айқын, бағдарымыз – анық.

Қадірменді көпшілік!

Халқымыз қашанда жаңа жылдан жақсылық күтіп, келер күннен үмітін үзбеген.

Бүгінін болашағымен байланыстырып, бар ізгіліктің бастауын игі ниеттен іздеген.

Сондықтан, тіршілік жаңаратын Наурызда әр адам жақсылыққа ниет етуі тиіс.

Даласындай дархан халқымыз бүгінде Тәңірі берген табиғи жаңа жылын айрықша салтанатпен қарсы алуда.

Ендеше, жаңа жылды ізгі ниетпен қарсы алайық, ағайын!

Әз-Наурыздағы барша тілектеріңіз қабыл болсын!

Әр шаңыраққа Қыдыр қонып, бақ дарысын!

Тауық жылы береке-бірлігімен келсін!

 

Ұлыс оң болсын!

Ақ мол болсын!

Мереке құтты болсын!


 

Документы: 
ЖАРИЯЛАНҒАНЫ: 
20.03.2017-12:00:00
ЖАҢАРТЫЛҒАНЫ: 
09.11.2018-12:00:00